Lower Siang-a Assam police-te chet danah AAPSU lungawi lo

All Arunachal Pradesh Students' Union (AAPSU) chuan Assam police leh forest official-te Arunachal Pradesh-a Lower Siang district huam chhunga, Kangku Circle hnuai thingtlang khaw hrang hranga dan loa an chet fo dan chu an dem thu an sawi.

Zirlai pawl chuan Assam official-te hian thlai chinna hmunte an tichhia tih sawiin, hei hi Arunachal Pradesh mipuite vau leh tihṭhaih an tumna hmanruaah an ngai tih an sawi.

Assam police-te hian Papum Pare district-a Lora khua leh Longding district-a Longkhojan khuaa thingpui leh buh chinna hmunte an tichhia niin an sawi bawk.

Pathianni khan zirlai pawl hian emergency meeting neiin, Assam police-te chet danah an lungawi loh thu hi state sorkar chuan thuneitu sang lamah pawh thlen se an duh tih an sawi a ni. "State sorkarin thawm a nei lo leh a lo dawh zel ṭhin avangin ramriah midangte rikrap zawnga an chetna a hluar phah a ni," tiin AAPSP president Hawa Bagang leh general secretary Tobom Dai-te chuan an thuchhuahah an tarlang.

"Arunachal Pradesh leh Assam-in ramri buaina chinfelna dan ngaihtuahna inbiakna an kalpui mek karah, heng thil thleng hian inrem siam tumna a tichhe ṭhin a ni," tiin zirlai pawl aiawhte chuan state khawchhak leh khawthlang lama ramrite chu tlawh a, ramri hrula chengte dinhmun leh eng ang harsatna nge an tawh tih a hmun ngeia enpui an tum tih an sawi.

AAPSU chuan Assam leh Mizoram-in ramri buaina an neih mek chinfel a nih theihna turin sorkar laipui chu a rang thei anga inrawlh tura an phut thu an sawi bakah, Assam-a mimal leh pawl hrang hrangten Mizoram panna kawngpui an danchah mek chu hlip nghal tura an phût thu an sawi bawk.