Vaccine la lo sorkar hnathawkte hlawh hreksak a ni lo ang : Nagaland sorkar

Nagaland sorkar chuan civil secretariat leh directorate-a thawk, Covid-19 vaccine la lote hlawh pek a ni dawn lo tia thupek a lo tihchhuahte chu sutin, vaccine la lo pawh hlawh hreksak an ni dawn lo tih nimin khan a sawi.

July 17 khan state sorkar chuan vaccine dose khatna tal la lote chu ni 15 danah Covid-19 negative test report an neih ziah a ngaih thu sawiin, hetianga ti lote chu July hnu lamah chuan hlawh pek an ni lo ang, tiin thupek a lo tichhuak tawh a ni.

Sorkar thupek siam hian sawisel a hlawh hle a, political party leh pawl hrang hrangten an sawisel a, ṭhenkhat chuan lungawi lohna pawh an lantir a ni. Gauhati High Court-ah public interest litigation (PIL) thehluh niin, Kohima Bench-in ngaihtuahin he thupek hi lo 'stay' sak tawh bawk.

High Court-in a 'stay' sak hnuah Nagaland sorkar chuan a thupek siam tawh hi hnawlin, sorkar hnathawkte hlawh hi hreksak a ni dawn lo tih a sawi a ni. Office-a thawkte Covid-19 test neihna pawh a thlawn veka tihsak a ni dawn tih a sawi bawk a ni.