Assam miten Tripura ramri bul Lowairpua-ah kawng dang
Assam-a Karimganj district-a Lowairpua-ah tualchhung miten Assam aṭanga Tripura pan tur bungraw phur truck-te chu Thawhlehni khan NH 08-ah an dang.
Kawngpuiah hian mi eng emaw zat pungkhawmin, bungraw phur truck-te chu Assam aṭanga Tripura-a an tlan an remti lo a ni.
Assam-Mizoram ramria buaina a chhuah hnuah, Assam lam hian lungawi lohna lantirin Mizoram panna kawngpui leh rel kawng an dang a, Assam lam aṭangin motor a lut thei lo a ni. Hei vang hian Mizoram mamawh phurtu truck-te hi Tripura lamah kalin, Tripura aṭangin bungruate hi phurh luh a ni thung.
Tripura kaltlangin Mizoram-ah bungraw phur motor-te an lut tih an hriat hnuah, tualchhunga BJP worker leh mi ṭhenkhat chuan lungawi lohna an lantir a, North Tripura district thuneitute bakah Patherkandi circle hotute leh police-te hnenah NH 08 kaltlanga motor lutte chu dang vek turin an hriattir a ni. Kawng an dan vang hian Lowairpua-ah motor ṭhahnem tak an tangkhang a ni.
Hetih lai hian Barak Democratic Front (BDF) chuan he thil thleng hi an dem thu sawiin, BJP chu ramri chungchangah hmai hnih neia cheah a puh. State sorkar leh BJP chuan ramri buaina chu an chingfel thei lo niin an puh.