Sikkim hmarlamah India leh China-in military hotline siam

Indian Army chuan Sikkim hmarlam, China ram chinah India leh China sipaite chuan military hotline an siam tih sawiin, hei hi ram pahnih sipaiten inrintawnna an neih theihna tur leh, Line of Actual Control-a thawhdunna ṭha zawk an neih theihna tur a ni tih a sawi.

Hotline hi direct telephone line connection a ni. He hotline hi Pathianni khan hawngin, ram pahnih sipai ground commander-te chuan a hmanpui a, hotline kaltlang hian inṭhianṭhatna leh inremna thute pawh an inhrilh tawn nghal a ni.

Army thuchhuah chuan he hotline siam hi Kongra La, North Sikkim-a Indian Army leh Tibetan Autonomous Region-a Khamba Dzong hmuna China People's Liberation Army (PLA)-te inkara siam a ni.

India leh China hian Ladakha khawchhak lam, Chushul leh Daulat Beg Oldi-ah military hotline hi an lo siam tawh a, Arunahcal Pradesh-ah pahnih leh Sikkim-ah hian pakhat an lo siam tawh bawk a ni. Ladakh-a ram pahnih sipaite inepna a thlen leh hnuah, kumin February thla khan India leh China foreign minister-te chuan sipaite inkarah inbiakpawhna ṭha a awm theihna turin hotline thar siam belh leh hi an lo rel tawh a ni.