Manipur Congress hotu hluiin BJP a zawm

Manipur Congress president hlui Govindas Konthoujam chuan Thawhṭanni khan BJP a zawm.

Bishnupur bial aṭanga term ruk chhung MLA atana thlan tlin ni tawh, Konthoujam hian tun hnai khan Congress party hi chhuahsanin BJP a zawm tur thu a sawi a, Thawhṭanni khan BJP-ah lakluh a ni. Konthoujam lakluhnaah hian chief minister N Biren Singh, state BJP chief A Sharda Devi, Rajya Sabha MP Anil Baluni leh party in-charge for Manipur Sambit Patra-te pawh an tel.

Konthoujam chuan prime minister Narendra Modi-a kaihhruai sorkarin hmarchhak tana hmasawnna hna a thawh dan chu fakawm a tih thu a sawi a, hei hian BJP a zawm duhna chhan pakhat pawh niin a sawi.

Chief minister Singh pawh hi BJP a zawm hmain Congress party-ah a awm ṭhin a, Konthoujam chu a ṭhian ṭha tak nia sawiin, hruaitu dangte pawhin an party chu an la zawm ve ngei a rin thu a sawi bawk. Modi-a kaihhruai sorkarin hmarchhak pum tana a hma lakna te, hmarchhak bial aṭanga union minister panga a dahte chuan hmarchhak bial a ngaihsak zia a tilang a ni, a ti.

Assam Congress MLA-in BJP zawm
Assam Congresss MLA Sushanta Borgohain pawhin an party a chhuahsan hnuah, Pathianni khan state-a rorellai, BJP a zawm.

Kum 43 mi, Borgohain hi Guwahati-a BJP office-ah BJP state president Bhabesh Kalita, minister Pijush Hazarika leh party official dangte awm laiin lawmluh a ni.

Borgohain hian party chhungah inrem lohna an neih avangin Zirtawpni khan Congress party a chhuahsan tih a puang a, party chhunga buaina awm erawh chu sawizau a duh lo tih a sawi. Inrinni khan MLA a nihna aṭanga banna a thehlut bawk.

BJP Assam president chuan eptu party dang, All India United Democratic Front (AIUDF) MLA Phanidhar Talukdar pawhin August thla tawpah BJP a zawm dawn tih a sawi.