Ramri buaina chingfel turin sorkarin hma a la mek : Nagaland CM

Vawiinah House-ah Assam-Nagaland border sawiho dawn
Nagaland chief minister Neiphiu Rio chuan sorkar laipui chuan hmarchhak state hrang hrangten state ramri buaina an neih mekte chu India Independence Day vawi 75-na lawm hma ngeia chinfel turin hma a la mek tih Thawhlehnia Assembly inkhawmah a sawi.

Vawiin hian Assembly inkhawmah Assam-Nagaland border chungchang chu member-ten an sawi dawn a ni.

CM Rio chuan Assam chief minister Himanta Biswa Sarma nen pawh telephone-a inbiain, ramria buaina an neih mekah boruak ṭha leh muanawm a awm theih dan turte an sawidun tih a sawi.

July 31 khan Assam leh Nagaland hian border outpost aṭanga an police-te ve ve hnukkir turin inremna an lo ziak tawh a ni.

Deputy chief minister Y Patton chuan Assam nena an inrina bul, Vikuto, Ao Senden leh Tsutapela gate-ah duty pawh an dah belh dawn tih sawiin, Assam-in border outpost thar siam an tum leh a nih pawhin an lo do let thei dawn a ni, a ti. Patton chuan media report ṭhenkhat aṭangin, Assam sorkar chuan inter-state border hrulah camp siam an tum nia tarlan a ni a, mahse hemi chungchang hi official-a tarlan engmah a awm lo, a ti.

MLA Imkong L Imchen chuan tun hnaiah state pahnihten inremna an ziah chu House-ah a document hmuh tur a awm lo tih sawiin, state sorkar chuan eng ang invenna nge a kalpui a, Assam lam hi rawn che leh se beih let dan turah eng ang inbuatsaihna nge a neih a zawt. Speaker Sharingain Longkumar pawh border issue hi assembly session neih mekah sawiho phal turin a ngen bawk a, vawiin hian House-a Assam-Nagaland border sawiho a ni dawn ta a ni.