Manipur-ah Remdesivir lem tam tham tak man

Manipur police-te chuan Bihar mi pakhat hnen aṭangin Remdesivir damdawi lem ṭhahnem tak an man.

Imphal East SP N Herojit Singh chuan ASI Aktar Hussain kaihhruai police team-in Imphal East district-a Tribal Market bul, New Checkon Area an dapnaah heng damdawi hi an man tih a sawi. Damdawi neitu, Bihar-a Sasam khaw mi Lolo Sah (55) an man tel bawk. Police-te chuan thu an zawtfiah nghal a, damdawi a lakna document pawh engmah hmuh tir tur a nei lo tih an sawi.

Police-te chuan an damdawi man Remdesivir hi a damdawi dik tak aiin a lian zawk niin an sawi a, mahse a bawmah hian a man pawh a pangngai angin Rs 4,400 a in print vek tih an sawi. He damdawi hi Myanmar lamah demand a sang a, a man inziak let zeta toin an hralh ṭhin niin an sawi a ni.

SP chuan damdawi neitu an man hi July 31 Air Asia flight-in Guwahati aṭangin Imphal a rawn thleng tih a sawi a, thurualpui pakhat a neih thu leh, hei hi zawn mek a nih thu a sawi bawk.