Meghalaya-a Coke factory siam duh lohna lantir

Meghalaya-a Enviro­ment Coordination Committee (ECC) chuan East Jaintia Hills district-a coke factory siamte chu an duh loin, Thawhlehni khan Khilehriat-a Deputy Commissioner office panin lungawi lohna lantirin kawng an zawh.

Kawngzawhnaah hian Sutnga Saipung bialtu MLA Shitlang Pale pawh a tel a ni.

Committee chuan an bial chhunga dan kalha coke factory dinte chu khar vek an phut thu an sawi a, heng factory-te hian environment nasa taka an tihchhiat bakah, a chhehvela cheng a bikin naupangte hriselna lamah pawh nghawng ṭha lo tak a nei a ni, an ti.

ECC legal adviser Reading War chuan coke factory 55 chuan No Objection Certificate (NOC) an nei niin a sawi. Kawngzawhte chuan state sorkarin bial mipuite duh dan ni loin factory din phalna a pe chu an dem thu an sawi.

Deputy Commissioner E Kharmalki chuan Committee-in kawng­zawh huaihawt an tum thu a hriat hnuah, Elaka Sutnga biala dan loa coke factory din, Consent to Operate (CTO) nei lote chu khar vek turin thupek a tichhuak a ni. July 15 khan DC hian thupek hi a lo tichhuak tawh bawk a, mahse factory-te hian he thupek hi an zawm duh lo tih Committee chuan an sawi bawk.