Assam ramria chengte venghim turin Meghalaya sorkar phût

Meghalaya-a Congress Legislature Party (CLP) chuan Thawhlehni khan Assam nena hun rei tak hmun 12-a ramri buaina an neih chungchang sawihoin meeting an nei.

Meeting hi Leader of Oppostion Mukul Sangma-a'n a kaihhruai a, Congress MLA Mohendra Rapsang, Miani D Shira, Kimfa Marbaniang leh Hima Shangpliang-te an tel. Meeting zawhah press conference an neihah, Sangma chuan ramri hrula chengte dinhmun leh state pum mipuite duhdante pawh an sawiho tih a sawi.

Sangma chuan Assam ramri hrula cheng mipuite dinhmun leh tawrhna thleng ṭhinte chu Meghalaya sorkar chuan a ngaihven ṭha tawk lo ṭhin niin a sawi. Sorkar hmasa, a kaihhruai Congress sorkar khan Assam-in a chuhpui ramri-te chu Meghalaya ram chin ngei a ni tih tarlanna document eng emaw zat pawh a lo thehlut tawh a, heng document-teAugust 6-a Assam leh Meghalaya chief minister-ten ramri chungchanga meeting an neih turah Meghalaya lam chuan behchhanah a hmang tur a ni, a ti.

State mipui leh an duhdante venghim tura Meghalaya sorkar ngenin, Congress hruaitu chuan ramri chungchanga resolution an siam tur chu state mipuiten an pawm tlan theih tur a ni tur tih a sawi.

CM hlui chuan MDA sorkar chu inter-state border-a chengte tihhmasawnna tura sorkar hmasain hma a lo lakna te chu ngaihven zui lohah a puh bawk.

Mukul Sangma hian tun hnaia Assam police leh tualchhung mite intihbuaina, Ri-Bhoi district-a Iongkhuli khua chu a tlawh a, a hmunah ngei thil awmdante enfiah a tum tih a sawi bawk. Iongkhuli khuaah hian Meghalaya Energy Corporation Limited (MeECL)-in electric ban an phunte chu Assam police-ten an phawi sak a, hei vang hian tualchhung miten nen an innawr buai hman a, mahse buaina nasa zawk a chhuah hmain boruak an thunun thei a ni.