Meghalaya-Assam border : 'Give & take policy pawm theih a ni lo' - Congress MLA

Meghalaya Congress MLA PT Sawkmie chuan hun rei tak Assam-Meghalaya ramri buaina an lo neih tawh chinfelna turin 'give and take' policy chu pawm theih a ni lo tih a sawi.

Mawlai bialtu MLA, Sawkmie hian Nilaini khan chanchinbu mite kawmin, state ramri buaina chinfel dan kawnga zawnga inbiakna neih a ni chu a lawmawm thu a sawi a, hemi rual hian state sorkar chuan beisei a nei sang nghal tur a ni lo, a ti. "Inbiakna neih ṭanna chauh a nih avangin chinfel nghal mai tura beisei tur a ni lo a, hun a duh rei dawn a ni," a ti.

Ramri chungchangah an party dinna chu a ngai reng tih sawiin, Sawkmie chuan Assam-Meghalaya ramri chungchangah 'give and take' policy chu englai mahin an pawm dawn lo tih a sawi. "Report kan hmuh aṭangin, Assam chu kan ram chinah a rawn lut a, keini lam erawh kan lut ve lo. He policy anga kan kal a nih chuan kan ram tam tak chu Assam lakah kan chan mai dawn a ni," tiin a sawi. Ramri chungchang chu tuna an luah chin ni loin, document awmsate behchhana sawiho a ṭul thu a sawi bawk.

Nakkuma Meghalaya-in state a nih champha vawi 50-na a lawm hmaa ramri buaina chinfel chu thil theih a ni lo tih a sawi.

Julu 23 khan Shillong-ah state pahnih chief minister-te chuan ramri chungchangah official meeting an lo nei tawh a, vawiinah Guwahati-ah meeting hi an nei chhunzawm leh ang.