Manipur CM leh PM Modi inkawm

Manipur chief minister N Biren Singh chuan Nilaini khan Delhi-a prime minister Narendra Modi a hmu a, an state chhung mamawh hrang hrang bakah hri leng dinhmunte a sawipui.

Manipur hian Covid­-­19 hri leng thawh hnihna a tuar na hle a, July thla chhung khan chawhrualin nitin hri kai thar 1,000 vel leh, hri vanga thi mi 10 chuang zel awm ang an ni.

PM Modi chuan hri leng dona kawnga a theih angin an puih zel tur thu Singh hi a lo hrilh a, hmasawnna tura state sorkar hmalakna hrang hrangah pawh thawhpui zel a lo tiam. Manipur CM-in an state-a project lian tham thawh tur hrang hrang hawng leh lungphum phum tura a sawmna pawh a pawm nghal bawk. Modi chuan Tokyo Olympics 2020 neih meka Manipur state aṭanga infiammite chet ṭhat avangin CM hi lawmpuina a hlan bawk a, India ram tihmingṭha turin infiammi ṭha tak tak tam zawk an lo thawh chhuah zel a beisei thu a hrilh bawk.

Manipur CM hian PM bakah union home minister Amit Shah, finance minister Nirmala Sitharaman leh defence minister Rajnath Singh-te a hmu bawk a ni.