Nagaland-Assam border chungchangah Nagaland Assembly-in resolution pass

Nagaland Legislative Assembly (NLA) member-te chuan Ningania Assembly inkhawmah Nagaland-Assam border chungchang chu an sawiho hnuin, hun rei tak ramria buaina an lo neih chinfel a theihna turin lungrual takin resolution an pass.

Resolution-ah hian point pathum tarlangin, a point pakhatnaah chuan Nagaland leh Assam sorkar chuan an buaina hi court-a kalpui kher loa chinfel dan zawng rawh se an ti. Hei bakah hian House-in Selection Committee a din chuan Nagaland-Assam border kaihhnawih thil chi hrang hrangte zirchiangin, thla thum chhunga report thehlut turin an ti bawk. Hei bakah hian Union Home Minister hnenah chinfel vek a nih hma chuan state pahnihten ramri chungchanga an awm dan tura inremna an lo siam tawhte zawm a nih theihna tura hma la turin ngen an rel bawk.

Select Committee hi chief minister Neiphiu Rio-a'n hoin convenor a ni dawn a, deputy chief minister Y Patton leh opposition leader TR Zeliang-te chu co-convenor an ni bawk ang. MLA Paiwang Konyak, Jacob Zhimoni, Mhthung Yanthan leh Amenba Yaden-te chu member niin, MP KG Kenye leh Tokheho Yepthomi-te chu special invitee an ni bawk ang.

Ningania Nagaland-Assam border chung­chang sawihonaah hian eptu MLA Yollow Konyak chuan Longleng district-a Ladigarh khuaa sorkar school, kum 2007 aṭanga Assam police-ten an luah chungchang sawi chhuakin, zawhna a zawt nghal bawk. PWD minister Tongpang Ozukum chuan he school hi kum 1972-a din a ni a, mahse Assam police-ten an luah avangin Ladighar khaw daiah school kalna tur hi siamchawp a ni tih a sawi.

Minister chuan Assam­-­in school hi an laksak dan aṭangin an ṭhenawm state-in an ram an chuh dan chu a langchiang hle niin a sawi. School kalna tur an siamchawpah han zirlai 32 leh zirtirtu pathum an awm thu a sawi bawk. He thil hi thil pawi tak a nih thu sawiin, Ladigarh khua hi kum 1963-a din niin, state sorkar chuan kum 1969 khan a pawm tih a sawi a ni. Nagaland sorkar hnuaiah he school hi register ni mah se, Assam chuan a luahsak tih a sawi.

Chief minister Rio pawhin Supreme Court thupek angin, school complex-ah hian para-military force, army leh police an awm thei lo tih a sawi bawk. He khuaa chengten hemi chungchang an auchhuah pui loh chhante zawtin, Assam nena ramri buaina an neih chungchangah ramri hrula chengte chu an ram chin venghim tura theihtawp chhuah turin a chah bawk. MLA zawng zawngte pawh sawiho ringawt chu duhtawk loin, ramri buaina chinfelna tura inlungrual taka bei zel turin a chah bawk a ni.