Assam-in March 29 thleng zirna in khar

Assam sorkar chuan Covid-19 leng mek laka invenna atan state chhunga zirna in, sorkar leh private school, college, institute leh university-te chu nimin aṭang khan March 29 thleng atan a khar. Zirna in bakah cinema hall/multiplex, gymnasium leh swimming pool-te pawh khar an ni bawk. 

Assam chief secretary Kumar Sanjay Krishna chuan state sorkar chuan shopping mall khar chungchang pawh a la ngaihtuah dawn tih a sawi. Krishna chuan state chhunga Covid-19 kai hmuh la awm lo mah se, sorkar chuan theihtawpin hri leng laka invenna hi a kalpui tih a sawi. He hri kai rinhlelhte dahhranna tur centre 800 chuang siam a ni a, sorkar hospital hrang hrangah isolation ward 100 chuang leh ICU khum 50, private hospital-ah ICU khum 50 chuang pawh a ṭul huna hman theih tura ruahman a ni tawh bawk, a ti. 

Zirna in hrang hrang khar ni mah se, CBSE leh Board exa­mination-te erawh chu ruahman lawk angin kalpui a ni dawn a, mahse examination dang erawh chu neih a ni rih lo ang. Chief secretary chuan district tina deputy commissioner-te chu an bial chhunga mipui punkhawmna lam buatsaih lo leh pumpelh tura zirtirna pe tura ngen an ni tih a sawi. Sorkar programme zawng zawng pawh ṭhulh rih a nih thu a sawi bawk. "Campaign hrang hrang hmangin mipuite zirtirna pek mek an ni. Thingtlang lam bialah chuan Gaon Panchayat leh ASAH worker-te chuan hri leng laka invenna dan chungchanga inzirtirna te an pe a, district tinah rapid response team pawh siam vek an ni bawk," a ti. 

Hemi rual hian mipuite chu chiai lo turin a chah nghal a, health department lamin inven dan leh in enkawl dan tur an siamte chu zawm turin a ngen. Bangladesh ramri, Sutra­kandi/ Mankachar leh Bhutan ramria Darranga-ah chuan medi­cal team dahin, ramri kaltlanga lutte chu uluk taka an hriselna dinhmun enfiah sak zel an ni tih Krishna chuan a sawi. Inter­national border-a entry leh exit point dang erawh chu khar vek an nih thu a sawi bawk.

Vawiin aṭangin Meghalaya-ah zirna in khar dawn 

Meghalaya sorkar pawhin vawiin aṭangin Covid-19 vang hian tiam chin awm loin zirna inte khar vek an ni dawn tih nimin kha na puang. State health minister AL Hek chuan nimina Legislative Assembly inkhawmah hei hi puangin, thupek awm leh hma chuan zirna in te hi khar vek a nih tur thu a sawi. 

Hmarchhakah test centre panga 

Hmarchhak state hrang hrangah Covid-19 kai hi an la awm lo nia hriat a ni. Hetih lai hian state tinte hian he hri kai leh kai loh enfiahna tur, test centre erawh an la nei vek lo a, hmarchhak bial pumah test centre hi panga chauh a la awm a ni. 

Test centre-te chu 

    Assam -

1)     Gauhati Medical College, Guwahati

2)     Regional Medical Research Centre, Dibrugarh

     Meghalaya - 

1)     NEIGRIHMS, Shillong

     Manipur - 

1)     J N Institute of Medical Sciences Hospital, Imphal East

    Tripura - 

1)     Government Medical College, Agartala