Covid-19 : Hmarchhak dinhmun

Hmarchhak state hrang hrangah Covid-19 kai hmuh belh zel an ni a, mahse health official-te chuan hmarchhak biala hri kai hmuh tawh zinga 98% vel chu taksaa natna langchhuak lo, asymptomatic an ni tih an sawi. 

Hripui leng vanga rampuma inkharkhipna kalpui a nih avanga hmun danga tangkhangte hruai haw hna kalpui mek a ni. Hmarchhak state pariatah hmun danga tangkhang haw hi mi nuai thum chuang an tling tawh a ni. 

Arunachal Pradesh-ah Ningani khan hri kai panga hmuh belh a ni a, Covid-19 hmuh tawh hi mi 43 a tling tawh a ni. 

Hri kai hmuh mi 43 zingah pakhat hi enkawl dam a ni tawh a, mi 42-te chu enkawl mek an ni. Ningania hri kai hmuh thar zinga pathum chu Changlang district-a mi niin, West Siang leh Namsai district-ah mi pakhat ve ve an awm bawk. 

Ningani khan sample 467 test a ni a, heng zinga panga chu an positive a ni. AP-ah hian sample test tur 10,025 lakkhawm a ni tawh a, 1,427 sample result nghah mek a ni. 

Assam chu hmarchhak state zinga hri kai tamna leh pun chakna ber a ni. Nimin thleng khan Assam-a hri kai hmuh tawh hi mi 2,115 an tling tawh. 

Ningani khan hri kai hmuh chhuah thar hi mi 285 an awm a, ni khata hri kai hmuh thar tam ber ni a ni leh a ni. Nilaini khan hri kai hmuh chhuah hi mi 269 an awm bawk. 

Guwahati central jail-a rukruk vanga tang pakhat chuan Covid-19 a kai tih hriat a ni a, jail chhunga hri kai hmuh hmasak ber a ni. Hri a kai tih hriat a nih hnuah damdawi-inah dah nghal a ni. 

Assam-ah hian Covid-19 vangin mi pali an thi tawh a, hri kai zinga 459 chu enkawl dam an ni tawh thung. 

Health minister Himanta Biswa Sarma chuan hmun dang aṭanga haw, quarantine centre-a awm mek zingah harsatna siam zawnga chete chu bail theih loh thubuai siamsak zel an ni ang tih a sawi. Minister hian Bongaigaon leh Chirang district-a qurantine centre-a awm ṭhenkhatin ei tur an peka lungawi loa buaina an siam avangin he thu hi a sawi a ni. Centre-a harsatna siam leh health worker-te hnathawh tibuai zawnga chete te chu 'tualthah tuam puhna' thubuai nena intluk thubuai siamsak an ni dawn a ni, a ti. Centre-a awm mek, harsatna tawkte chuan amah pawh an bepawp thei reng ang tiin a sawi bwak. 

Manipur-ah Covid-19 kai hmuh tawh chu mi 124 an tling tawh. 

Health department chuan hri kai hmuh chhuah tawh zinga 38 chu enkawl dam niin, damdawi-in aṭangin chhuah tir an ni tawh tih a sawi. Hri kai mek hi mi 89 an la awm a ni. 

Health and family welfare minister L Jayantakumar Singh chuan hri leng chu a darh zel lohna turin sorkar chuan a theihtawp a chhuah mek a ni, a ti. Minister hian Ningani khan Kamjong leh Kangpokpi district-te tan Bolera Ambulance a hlan a ni. An state-ah hri kai hmuh belh zel an nih avangin Imphal West district-a UNACCO School chu Covid hospital atan siam dan ngaihtuah mek a nih thu a sawi bawk. 

Nagaland-ah hri kai hmuh chhuah belh mi 14 an awm hnuah an state-a Covid-19 kai hmuh tawh chu mi 94 an tling tawh. 

Health minister S Phangyu Phom chuan hri kai hmuh tharte hi Chennai aṭanga hawte vek an ni tih a sawi. Ningani khan Chennai aṭanga haw zinga mi 235 sample test a ni a, an zinga 14 chu an positive a ni. 

Nagaland-ah hian Chennai aṭanga haw zinga pakhat chu Covid-19 kai tih hmuh chhuah a nih hnuah Nilaini zan khan Dimapur aṭangin a awmna district Peren district-a thawn haw zingah telh a ni. Dimapur district surveillance officer Dr Imtiwabong Aier chuan thuchhuah siam nghalin, he thil thi an tihsual palh a ni thu sawiin, Peren district chief medical officer pawh hriattir nghal a ni, a thlen veleh dah hran nghal a ni, a ti. 

Aier chuan district surveillance team thil tihsual chu pawi a ti takzet tih a sawi nghal bawk. 

Sikkim-ah Shramik special train hmanga Mumbai aṭanga haw pakhat chuan Covid-19 a kai tih hmuh a ni a, Sikkim-ah hri kai pathumna a ni. 

Mumbai aṭanga haw hi dam lohna nei sa a ni a, a sample pawh test turin an thawn tawh a, mahse sorkarin tangkhangte  hawna tur rel a buatsaihah a haw tel ve ta tho a, rela a awm laiin a test result hi a hria a ni. Hri a kai tih hriat a nih hnuah rel-a a bulhnaia awm mi 12-te chu dah hran nghal niin, hri kai pawh hi Sikkim a thlenin ambulance hmangin damdawiin panpui nghal a ni. 

Tripura chief minister Biplab Kumar Deb chuan Ningani khan an state-ah coronavirus kai hmuh chhuah belh mi 25 an awm tih a sawi. Tripura-a hri kai hmuh tawh hi mi 647 an tling tawh a ni. 

CM chuan Ningania sample 875 test zingah 25 a positive thu zanah khan a puang a, hri kai hmuh tharte hi hmun danga zin chhuahna nei vek an ni, a ti. 

Tripura-ah hian hri kai hmuh tawh zinga mi 173 chu enkawl dam ni tawhin, damdawi-in aṭangin chhuah tir an ni tawh. Mi 470-te chu Covid care centre leh hospital-ah enkawl mek an ni a, ngaihtuahawm an awm lo nia sawi a ni.