Assam leh Meghalaya CM-te inbe leh Ramri buaina a tahtawla chinfel rel

Assam chief minister Himanta Biswa Sarma leh Meghalaya chief minister Conrad K Sangma-te chu Zirtawpni liam ta khan state pahnihten ramri buaina an neih mek chinfel dan ngaihtuahin ah inbe leh. Hei hi state border chungchanga CM-ten official meeting an neih ṭum hnihna a ni.

Zirtawpnia meeting hi Guwahati-ah neih a ni a, meeting hmasa kha Shillong-ah neih a ni thung. CM pahnihte chuan Assam-Meghalaya ramri buaina neih mekte chu a tahtawla chinfel an rel. Hemi atan hian state sorkar pahnihte hian cabinet minister-in a kaihhruai, committee an din ve ve dawn tih an sawi.

Committee-te hian ramri buaina neih mekna, hmun 12 zinga hmun paruka buaina chu a thawh khatnaah chinfel dan an ngaihtuah phawt dawn a ni.. Heng hmunte hi - Tarabari, Gijang, Phalia, Baklapara, Pilingkata leh Khanapara hmunte an ni. Assam-a Cachar, Kamrup Metro leh Kamrup Rural district leh, Meghalaya-a West Khasi Hills, Ri Bhoi leh East Jaintia Hills district huamchhunga mi an ni.

State pahnihten committee an dinah hian member panga ve ve awmin, cabinet minister-in an ho ang a, member-ah state bureaucrat te bakah tualchhung aiawhte an tel bawk ang.

Committee member-te hian ni 30 chhungin ramri buaina lai hi a hmunah tlawhin, civil society member-te an kawm dawn a ni

Assam CM chuan meeting ṭha tak leh hlawkthlak taka an nei thei chu lawmawm a tih thu sawiin, state sorkar pahnihte chuan ramri chungchanga inhriatthiam lohna leh buaina awmte chu chinfel ngei an duh a ni, a ti. Hun rei tak buaina an lo neih tawh avang hian mi tam takin an tawrh phah tawh thu a sawi bawk.