Meghalaya-in private hospital-a hri kai enkawlna man bithliah

Meghalaya sorkar chuan state chhung private hospital-a Covid-19 kaite enkawlna man bithliah a siam.

Medical expert-te thurawn angin, state sorkar chuan private hospital-a hri kai enkawlna rate hi a siam a, Megha Health Iinsurance Scheme (MHIS) huam tir a ni bawk dawn tih health minister Prestone Tynsong chuan a sawi.

MHIS hi universal health insurance scheme (UHIS) niin, Meghalaya-a cheng, central leh state sorkar hnuaia thawk ni lo zawng a huam a ni. Sorkarin rate thar a siam hi August 15 atangin hman tan a ni ang.

Health minister chuan an state-a hri kai hmuh thar zinga a tam ber chu Delta variant kai an ni tih a sawi. Hei hi inkaichhawn awlsam tak a nih avangin mipuite chu inthlahdah lo a, theihtawpa fimkhur zel turin a chah.

Mipuite chu vaccine la tha tura ngenin, hei hi hri do letna pawimawh a nih thu a sawi. Minister chuan an state mipui zinga 45% chuan vaccine an la tawh tih a sawi bawk.

August thla laihawlah school hawn theih besei
Meghalaya education minister Lahkmen Rymbui chuan an state-a zirna inte chu August thla laihawlah hawn theih beisei a nih thu a sawi.

Rymbui chu zirna in, a bikin higher education institute-ah te class room-ah ngei zirna kalpui thuai a tul tih sawiin, zirlai vaccine la thei chin zingah 50% velin an la tawh a, thla laihawlah chuan la zat pawh hi an la pung chho leh dawn a ni, a ti.

"Thil dangte pawh kan hawng chho ṭan a, bazar pawh hawn a nih tawh laiin engvangin nge school hawn a la nih ve loh? Hei hi ka mimal ngaihdan a ni. School hawn chungchang chu Health department nen kan ngaihtuah ho dawn a ni," tiin a sawi.