PM leh Home Minister hmu turin Delhi-ah Assam Chief Minister a zin

Assam chief minister Himanta Biswa Sarma chu tun hnaia Assam-Mizoram buaina thleng leh, hmarchhak bial chungchangte prime miniter Narendra Modi leh union home minister Amit Shah sawipui turin Inrinni khan Delhi-ah a zin.

Chief Minister hian Pathianni khan Assam BJP MP-te chu Delhi-ah meeting a neihpui bawk a, nimin khan MP-te hian an ṭawiawm nghal bawk a ni. Nimin khan PM leh Home Minister-te hi a hmu thei dawn tih a sawi a, mahse meeting an neih hun tur tak erawh sawilan a ni lo.

Modi leh Shah-te a hmuh hmaa The Hindu-in an kawmnaah, Sharma chuan Assam-Mizoram border-a buaina a chhuah hmain ṭawngkam huatthlala lam hawi engmah a sawi lo tih sawiin, "Kan police-te kahhlum an nih hnuah chauh ka ṭawng a ni. An tana ka ṭawng chhuak lo a nih chuan ka thlahthlam tihna a ni dawn. Assam police-te hian hun rei tak ULFA leh inlakhran duhtu pawl dangte an bei let reng a, an rilru tihhnual sak hi kan duh ngai lo ang," a ti. A ngaih pawimawh hmasak ber chu Assam venhim a ni tih sawiin, Meghalaya leh Arunachal Pradesh hruaitute pawh a biak mek thu a sawi.

Assam-Mizoram border-a buaina a chhuah hnuah, Assam-a all-party delegation, member 19-te pawhin ramri buaina thleng chungchang sorkar laipui sawipui turin Delhi-a kal an lo rel tawh bawk a, Mizoram nena an buaina chu a rang thei anga chinfel sak turin nawrh an tum a ni.