Sikkim CM-in an state-a hnam 12-te ST status pek phut

Sikkim chief ministr PS Golay chuan Pathianni khan union home minister Amit Shah hnenah memorandum thehlutin, an state-a hnam 12-te chu Scheduled Tribe (ST) status pe ve tur leh, Sikkim Legisalative Assembly-ah Limboo leh Tamang hnam tana seat reservation siam turin a ngen.

Pathianni khan Sikkim CM hian Amit Shah hi a chenna inah tlawhin, a thil phutte hi a sawipui a ni. Golay chuan, "Chogyal hunlai aṭangin, Sikkim-a hnam lian pathum - Bhutia, Lepcha leh Nepali-te chu dinhmun in ang vek pek an ni. Mahse India rama chhunluh a nih aṭanga kum thum hnuah, Bhutia leh Lepcha-te chu ST status pek niin, kum 2003 -ah Limboo leh Tamang-te pek an ni ve leh a, hetihlai hian hnam 12 dang erawh chu telh an ni lo thung," a ti. Limboo leh Tamang hnamte hi ST status pek an nih hnuah Assembly-ah reservation siamsak an la ni lo bawk tih a sawi.

CM Golay chuan Punjab, Rajasthan, Gujarat, Assam, Meghalaya, Tripura leh West Bengal-a India-Pakistan leh India-Bangladesh border-a Border Wing Home Guards (BWHG) dah an nih chungchang pawh sawichhuakin, Sikkim-ah pawh BWHG battalion hnih dah turin a ngen bawk a ni.