Meghalaya-Assam border-ah KSU leh Assam police-te inhnialbuai

Assam Police leh Khasi Students Union (KSU) member-te chu Pathianni khan Assam-Meghalaya border-ah an inhnialbuai a, mahse buaina lian tham erawh a chhuak hman lo.

Assam-a Karbi Students' Association (KSA) chuan Meghalaya-in an ram chin a luahsak nia sawiin Sabuda khuaah nawrh an huaihawt a, hei hi KSU hian duh loin Umnat khuaah nawrh huaihawt let ve tumin an kal a ni. Mahse KSU team hi Ummat an thlen hma, Jatalong khuaah Assam police-te chuan lo dangin an kaltlang an remti lo a, an inhnial zui a ni.

Assam police-te chuan state pahnih chief minister-ten ramri buaina chinfel tuma inbiakna an neih chhoh mek lai a nih avangin KSU-in nawrh an huaihawt chuan harsatna a thlen thei nia sawiin an lo dang a ni. Khasi zirlai hruaitute nen hian na takin an inhnial zui a, mahse a hnuah Meghalaya police-te rawn thlengin Assam police-te hnenah KSU leh Ri-Bhoi Youth Federation aiawhte chu Ummat an tlawh phalsak turin an rawn ngensak a ni. Hemi hnu hian Assam police-te chuan an zinga ṭhenkhat chu Ummat kal an phalsak a, boruak pawh a ziaawm thei ta a ni.

KSU leh RBYF hruaitute hian Nongtung Ummat hnam 12-te thlan, ‘Mawbah Khad Ar Kur, Nongtung Ummat’ tia hriat lar chu tlawhin he hmun hi an state chanchina hmun pawimawh tak, Meghalaya-a Raid Nongtun hmun a nih thu an sawi.

Khasi zirlai hruaitute chuan Karbi zirlaite chet dan chu an dem thu sawiin, border area-a Khasi mi chengte laka harsatna siam lo turin an vau zui bawk. Meghalaya kaihhnawih thila an lo inrawlh leh a nih chuan KSA chuan a let an tuar ngei dawn tih KSU hruaitu chuan a sawi. Pressure group pawhin Meghalaya sorkar chuan Raid Nongtung chu ram buai lai a ni lo tih an hriatchian a ngai tih sawiin,, Raid Nongtung-a khaw 18-te chu Assam-in an laksak an phal ngai dawn lo tih an sawi bawk.