TMC-in Tripura tlawh turin NHRC a phut

All India Trinamool Congress (AITC) chuan Tripura-a an party mi leh sate beih an nih chungchanga enfiah turin National Human Rights Commission (NHRC) chu an kal dawn em tih an zawt.

AITC thupuangtu Kunal Ghosh chuan press conference-ah Agartala-a an party mi leh sate chungah thil thleng chungchang chu NHRC chuan a chhuichiang ngam dawn em tih zawtin, NHRC chu BJP central hruaituten an duh dan anga an thunun a nih avangin an hnathawh chin pawh bithliah an siam niin a puh.

"NHRC hian Tripura-a human rights palzut a nih dan te, BJP mi leh saten eptu pawl hruaitu leh worker-te an beih dante hi an enfiah ngam dawn em?," tiin, Ghosh chuan BJP kaihhruai sorkar chuan state chhung hmun hrang hranga tharum thawhna a thlen tir tih a sawi.

Ghosh chuan, "Tripura police-te chuan Covid-19 khuahkhirhna dan chhuanlamin, kan party mi leh sa 14 an man ringawt a ni," a ti.

Pathianni khan AITC national secretary Abishek Banerjee chuan Tripura hi a tlawh a, MP Dola Sen, West Bengal minister Bratya Basu leh Kunal Ghosh-ten an ṭawiawm a ni. Party hruaitute hi an party worker-te hrenna, Khowai police station-ah an kal nghal a, a hnuah police-te chuan an mi mante hi Khowai District Court-ah hruaiin, court chuan an vai hian bail-a chhuah a lo phalsak a ni.