Manipur-a Indo-Myanmar border bulah ralthuam man

Security force-te chuan Manipur-a Tengnoupal district-a Indo-Myanmar international border bulah ralthuam ṭhahnem tham tak an man.

Intelligence report an dawn bawhzuiin, Manipur police leh Assam Rifles-te chuan Moreh khuaa Ward no 7-a S Moljol-a in pakhat a dap a, ralthuamte hi an man ta a ni. An thil mante hi AK 47 rifle pahnih, M-16 rifle pahnih, 9mm pistol pathum, China siam hand grenade pakhat, AK-56 leh M-16 magazine pakua, 9 mm pistol magazine pali, 7.62 mm mu 361, 5.6mm mu 31, 9 mm mu 23, .38 mm mu pali, small calibre mu pasarih leh 8xbinoculr pakhat a ni.

Ralthuam neitu man an awm lo a, an dap lai hian inah hian tumah an awm lo bawk tih police-te chuan an sawi. Ralthuam an mante hi Moreh police station-ah an hlan nghal a ni.