Hmarchhak state-te ramri buaina chungchangah Assam CM Sarma-a'n mawhphurtuah Congress a puh

Assam chief minister Himanta Biswa Sarma chuan hmarchhak state hrang hrangten state ramri chungchanga buaina an neih reng chhanah Congress party chu mawhphurtuah puhin, hmarchhak state-te siam an nih dawna an thil tihsual chu tun thlengin mi tam takin an la tuar chhunzawm zel a ni, a ti.

BJP hruaitu Sarma chuan Congress party hian hmarchhak state-te an siam dawn hian ngaihtuah uluk lo takin an ti liam mai mai emaw, anih loh pawhin hmarchhak bial inpumkhat lo leh an intihbuai rengna turin eng emaw tak thil phiarruk an lo nei a ni thei ang, tiin a sawi.

Hmarchhak state-te ramri chungchang chu Constitution-ah sawilan a ni tur a ni, tiin Assam CM chuan a sawi. "Mizoram, Meghalaya leh state dangte siam a nih khan, Act-ah dahin ziak ngeiin lo dah tur a ni. Mahse hetiang hian an ti lo a, hei vang hian kum 3-5 tinah ramri chungchangah buaina awmin thihna hialte a thlen phah fo a ni," tiin state ramri buaina thlen fo chhan chu Congress party thil lo tihdik tawk loh vangah a puh.

Sarma chuan Jharkhand, Uttarakhand, Telangana leh Chhattis­garh state-te siam anih khan boundary chungchang chu chiang taka tarlan nghal niin, tun thlengin ramri chungchangah buaina an nei lo a ni, a ti.

Meghalaya CM nena an inbiakna sawichiang turin phut
Assam Congress party chuan chief minister Himanta Biswa Sarma chu tun hnaia Meghalaya chief minister Conrad K Sangma nena Assam-Meghalaya border chungchanga inbiakna an neih leh, Delhi-a prime minister Narendra Modi a hmuh ṭuma an thil sawite sawichiang turin an phut.

Assam Pradesh Cong­ress Committee (APCC) chuan CM chu hruaitu pahnihte meeting a neihpui ṭuma a thil sawipuite chu mipuite hriata puangzar turin an phut tih an sawi.

APCC chuan Megha­laya CM nena ramri buaina chungchanga an sawidun chu lawmawm an tih thu an sawi rualin, Sarma chuan Assembly-ah chief minsiterial-level meeting neiha thutlukna an siamte chu a puang tur a ni, an ti.

Eptute chuan Assam leh Mizoram sorkar chu tun hnaia state pahnih ramria buaina chungchangah thiam loh an chang tih sawiin, chief minister pahnihte chu puitling lo taka che a, buaina tipunlun zawnga thiltiah an puh bawk.