Tripura police-ten TMC MP leh hruaitute laka FIR ziak lut

Tripura police-te chuan Trinamool Congress (TMC) MP Abhisek Banerjee leh Dola Sen bakah party hruaitu dangte chu police-te hnathawh tur tibuaiah puhin an lakah FIR an ziak lut.

He thil hi Pathianni zinga police-ten TMC hruaitu leh worker 14 an man chungchang nghawng zel a ni. An party mi leh sate man an nih avang hian Thawhlehni khan West Bengal minister Bratya Basu leh MP Dola Sen-te chuan Khowai police station an pan a, hemi ni vek hian Abhishek Banerjee pawhin station hi a tlawh ve bawk.

Police-te chuan TMC hruaitute hi Additional SP leh police dangte an khumin mawi lo takin ân che niin an puh. Police-te hnathawh tur chu tibuaiah puhin FIR hi an ziaklut ta a ni.

Kar liam ta khan Abhishek Banerjee leh TMC activist ṭhenkhat chuan Tripura-ah hian beih an lo tawk tawh a, TMC party chuan heng mite hi BJP mi leh sate niin an puh.

Tripura assembly inthlan hi kum 2023-ah neih a ni dawn a, hemi atan hian West Bengal-a rorellai, TMC chuan Tripura-ah huang zauh tumin hma a la mek. State chhung politics dinhmun zirchiang turin poll strategist Prashan Kishor kaihhruai Indian Political Action Committee (I-PAC) team pawh an lo ruai tawh a ni. Mahse I-PAC team hi Tripura an thlen hnuah police-te chuan Covid-19 kaihhruaina siam bawhchhiaa puhin an thlenna hotel aṭanga chhuah phal loin an lo hreng tawh bawk.

West Bengal chief minister Mamata Banerjee chuan Tripura-a Abhisek Banerjee leh midangte beih an ni chu union home minister Amit Shah thupek niin a sawi a, mahse hetianga beih an nih avang hian an tlawm phah dawn lo tih a sawi bawk.