ATM hmuchhuaktu pianna Meghalaya hospital-ah ATM dah

Automated teller machine (ATM) hmuchhuaktu, John Adrian Shepherd-Barron pianna, Meghalaya-a Dr H Gordon Roberts Hospital-ah ATM dah a ni.

John Adrian Shepherd-Barron-a pianna hospital hian nakkumah kum 100 a tling dawn a ni. Hospital medical superintendent Dr Roken Nongrum chuan hospital kum 100 tlin hma ngeia ATM hi dahsak turin State Bank of India hnenah an ngen hnuah an rawn dah sak tih a sawi. ATM hmuchhuaktu pianna hmun ngeia dah a ni hi a special bik hle tih a sawi bawk.

Scotland mi Shepher-Barron hi kum 1925, June 23 khan Dr H Gordon Roberts Hospital-ah hian a piang a, a pa chu Chittagong Port Commissionerate-a Chief Engineer Wilfred Sheperd Barron a ni. Kum 2010, May 15 khan Scotland ramah a thi a ni. ATM hmasa ber chu kum 1967 khan London-ah siam niin, TV show-a star lar tak pakhat, Reg Varney chu ATM aṭanga pawisa lachhuak hmasa ber a ni.