AJP-in Adani kuta Guwahati airport hlan duh lo

Assam Jatiya Parishad (AJP) member-te chuan Adani Airport Holding Limited (AAHL) kuta Guwahati airport hlan tur chu duh loin, Nilaini khan Guwahati-ah lungawi lohna an lantir.

AJP hian Thawhṭanni aṭang khan signature campaign an nei a, Nilaini khan Lokpriya Gopinath Bordoloi International Airport bulah pungkhawmin, police-te chuan an zinga mi eng emaw zat an hreng a, mahse a hnuah an chhuah zui leh nghal a ni.

Party president Lurinjyoti Gogoi chuan an party leh state mipuite chuan private company kuta airport hlan leh a hming thlak a ni tur chu eng kawng mahin an pawm thei dawn lo tih a sawi. Hei bakah he airport hi tun hnai maiah mipuite chhiah pek hmangin cheiṭhat a ni, a ti bawk.

Lokpriya Gopinath Bordoloi International Airport hi October thla hian Adani group hnenah hlan tum a ni a, Airport Authority of India (AAI) staff-te nen pawh airport enkawl dan turah hian hma an la ṭan tawh niin official-te chuan an sawi. Adani Group hnena hlan a nih hunah AAI hian air traffic movement chiah a enkawl tawh ang.

Kum 2018 khan sorkar laipui chuan ram chhunga airport paruk, Guwahati, Ahmedabad, Jaipur, Lucknow, Thiruvananthapuram, leh Mangaluru-te chu Public-Private Partnership (PPP) model hnuaiah airport operation, management leh development chu private company kutah a hlan a ni.