Vaccine chungchanga thu dik lo thehdarhtu 2 thubuai siamsak

Meghalaya police-te chuan Covid-19 vaccine a ṭha tawk lo nia sawi a, thu dik lo thehdarhtu nia puh mi pahnihte chu thubuai siamsak an ni tih state home minister Lakhmen Rymbui chuan a sawi.

Minister Rymbui chuan social media kaltlanga thu dik lo thehdarh ṭhinte manchhuah theihna turin police-te chuan theihtawp an chhuah a, software leh intelligence network-te pawh an upgrade zel tih a sawi. Hemi rual hian fake account hmangte chhui chhuah nan chuan hun a duh ve deuh ṭhin tih a sawi bawk.

Meghalaya High Court-a division bench chuan social media platform hmanga Covid-19 vaccine chungchanga thu dik lo leh insawiṭhaihna lam hawi thehdarh a nih chungchang chu alo ngaihtuah tawh a ni. Hemi chungchanga public interest litigation (PIL) thehluh a ngaihtuahnaah, court chuan Meghalaya police-te chuan an tum tak tak a nih chuan thu dik lo thehdarhtute chu an manchhuak thuai thei tur a ni, a ti.

Court chuan social media platform hmangtute chu electronic trail an hnutchhiah zel a, hei vang hian chhui zui theih vek an ni tiin, Advocate General hnenah hemi chungchang hi ngai thutak viau turin a ngen.