Arunachal-Assam ramri buaina chinfelna turin AP-a political party-ten thawhho an remti

Arunachal Pradesh-a political party hrang hrangte chuan Assam nena state ramri buaina an neih mek chinfel a nih theihna turin lungrual taka thawhho an remti. An zingah hian BJP leh Congress pawh an tel.

Ningania Arunachal-Assam interstate boundary High Power Ministerial Committee (HPMC)-in consultative meeting a buatsaihah, party hrang hrang aiawhte hian ramri chungchanga thawhhona tur resolution an siam a ni. Political party-te resolution hi state chhunga pawl hrang hrang intelkhawm, Arunachal Indigenous Tribes Forum (AITF) leh All Arunachal Pradesh Student's Union (AAPSU) pawhin an thlawp thu an sawi.

Meeting hi home minister, HPMC chairman ni bawk Bamang Felix-a'n a kaihruai a, consultative meeting an kohna chhan chu hun rei tak Assam nena state border chungchanga buaina an lo neih tawh chinfelna tura hmalak dan tur ngaihtuahna atana ti an nih thu a sawi. Party hrang hrangte chu an party nihna dah ṭha a, Team Arunachal tana lungrual taka thawkho turin a ngen.

Chief minister Pema Khandu pawhin tun thla tir lam khan Assam leh Arunachal Pradesh chuan state boundary chungchang chu court pun kher loin chinfel dan kawng zawn an remti dun tih a lo sawi tawh bawk.

Home minister Felix chuan state ramri buaina chinfel tuma hmalaknaa state mipuite pawh boruak ṭha leh muanawm siam turin a chah bawk. August 15 hnu lamah HPMC chuan district level committee meeting a koh leh tur thu a sawi.

Consultative meeting-ah hian Arunachal Pradesh Congress Committee president Nabam Tuki, BJP president Biyuram Wahge, National People's Party vice-president Thangham Wangham, JD(U) secretary-general P Dolo, JD(S) president Rokom Apang, Peoples Party of Arunachal president Kaffa Bengia, AITF president Bengia Tolum leh AAPSU president Hawa Bagang-te an tel.