HNLC hruaitu hlui Chesterfield Thangkhiew kaphlum

Meghalaya-a helpawl, Hynniewtrep National Liberation Council (HNLC) hruaitu hlui Chesterfield Thangkhiew chu nimin zing khan Shillong-a Mawlai-Kynton Massar-a a chenna inah kahhlum a ni.

Kum 56 mi, Thangkhiew hi Thawhlehnia Shillong khawpuia bomb puak kaihhnawihah East Jaintia Hills police leh East Khasi Hills police joint team chuan nimin zing khan a chenna hi dapin, an inbeih hnuah kahhlum a ni ta a ni.

Thawhlehnia HNLC helten Laitumkhrah, Shillong-ah IED an tihpuahah khan mi pahnihin hliam an tuar a ni. July thlaa HNLC hel nia hriatte hian East Jaintia Hills district headquarters-a police reserve barrack-ah bomb an lo tipuak tawh bawk.

Police joint team chuan Thangkhiew chenna hi an thlen hian chem nen a lo bei nghal a, hei vang hian silaiin an kap zui tih an sawi. Hliam na tak tuarin damdawi-in panpui a ni a, mahse damdawi-in an thlen hi chuan a chatthla hman tawh a ni. Police-te chuan a chenna in aṭang hian 9 mm pistol pakhat, chem, laptop leh mobile phone eng emaw zat an man.

HNLC self-styled general secretary, Thangkhiew hi hi state chhunga helpawl hruaitu hlauhawm ber zinga mi nia sawi a ni ṭhin a, HNLC dintu zingah pawh a tel. Kum 1987 khan helpawl Hynniewtrep Achik Liberation Council (HALC) a zawm a, general secretary a ni hman. Mahse HALC hi ṭhiah a ni hnuah, kum 1997 khan pawl thar HNLC hi an din leh a, general secretary a ni. Kum 2004 aṭang khan Bangladesh-ah awmin, kum 2018, October thlaa Meghalaya deputy chief minister Prestone Tysong kuta a inpek dawn khan an state-ah hian a kir leh chauh a ni.