Sikkim CM-in PM hnenah memorandum thehlut

Sikkim chief minister Prem Singh Golay chuan Ningani khan New Delhi-ah prime minister Narendra Modi a hmu a, Sikkim Legislative Assembly-a Limboo leh Tamang hnam tana seat chanpual siamsak tura ngenin, memorandum a thehlut.

Chief Minister Golay chuan state chhunga hnam 12-te Scheduled Tribe (ST) status pe tura an ngen chungchang pawh PM hi a hrilh bawk. State mamawh hrang hrangte a sawipui bawk a ni.

Golay chuan, "Health leh education chu state sorkarin a ngaih pawimawhte an ni a, he sector hnuaiah hian project eng emaw zat thawh mek a ni bawk. Heng zingah hian Namchi-a khum 300 awm theihna tur hospital leh Netaji Subash Chandra Bose University of Excellence sak mekte pawh a tel a ni," a ti.

State chhunga inkalpawhna kawng ṭha neih a ṭul thu pawh PM hi sawipuiin, "Tlang ram a nih avangin hmun hla leh kilkhawr zawka awmte kalpawhna kawng ṭha kan mamawh hle a, hei hi security lam tan pawh thil pawimawh a ni," tiin ruahsurin state chhunga kawngpui tam tak a tichhia a, hengte siamṭhat leh thuai an nih theihna atan PM puihna hi a dil nghal bawk.