Assam assembly-ah bawng humhalhna bill pass
Assam Legislative Assembly chuan Zirtawpni liam ta khan eptuten an dodal chungin bawng humhalhna, Assam Cattle Preservation Bill, 2021 a pass.
Bill pass hma hian eptu MLA-te chuan draft hi zirchian leh phawt tura select committee hnenah thawn phawt an phut. Mahse an thil phut hi ngaihtuahsak an nih loh avangin bill pass dawn hian House atangin an chhuak tau a ni.
Bill-ah hian sorkar phalna lo chuan state chhungah bawng talh phal a ni dawn lo a, phalna pek pawh license nei ran talhna hmunah chauh talh phal a ni ang. Heng hmun hi Hindu, Jain, Sikh leh bawngsa ei lo tam zawk awmna veng/bial atanga km 5 huam chhungah an awm phal a ni lo, hemi huam chhungah hian bawngsa zawrh leh lei khap a ni bawk. Bawng hi kum 14 tling chin bak talh phal a ni lo.
State sorkar phalna lo chuan state chhungah leh an state kaltlanga pawn lama bawng phurh kual phal a ni lo bawk ang. Heng dan bawhchhiate chu bail theih loha hren theih niin, kum 3-8 thleng lung-in tantir theih an ni bawk.
Chief minister Himanta Biswa Sarma chuan House-ah bill hi pharhin, hei hi khawtlang inngeihna tur a ni, a ti. "Lower Assam leh Barak Valley-ah bawng talh a nih thin vang leh, temple-ah bawngsa hmuh a nih ṭhin avangin buaina pawh a lo chhuak fo thin. He bill hmanga thil tha lo tih tumna engmah a awm lo. Muslim tha tak takte chuan an dodal lo a ni," a ti.
Sarma chuan he dan hi bawngsa ei thinte chu an ei chhunzawm khap tumna a ni lo tih sawiin, "Mahse bawngsa eite chuan midang sakhaw rin dan chu an zahsak ve a tul a ni," tiin a sawi. Sakhaw tinte inzah tawn lohna a awm loh chiahin buaina a chhuak thin tih a sawi.
House Speaker Biswajit Daimary-a'n bill pass a nih thu a puan veleh, BJP member-te chuan 'Bharat Mata ki Jai' leh 'Jai Shree Ram' tia auin, an dawhkan bengin an lo lawm a ni.
June thlaa Assembly neihah khan Governor Jagdish Mukhi chuan welcome speech-ah bawng humhalhna chungchang hi a lo sawichhuak tawh a ni. Bawng chu ransa serh, ran thianghlim a nih avangin venhim a tul tih a sawi.
House-in a pass tak avangin an dan hman mek, Assam Cattle Preservation Act, 1950 thlakna atana bill siam thar hi dana chantir a, hman a nih theihna turin Governor pawmpuina chauh a ngai ta a ni.