ULFA-I in inkahhai pawtsei

Assam helpawl, United Front of Asom-Independent (ULFA-I) chuan state chhunga hri leng avangin inkahhai an lo puan tawh chu thla thum dang an pawtsei.

May 15 khan ULFA-I hian Covid hri leng avangin thla thum atan inkahhai hi an lo puang tawh a, nimin kha a tawp hun ni mah se Inrinni khan an pawtsei leh ta a ni.

Thuchhuah an siamah ULFA-I self-styled commander Paresh Baruah chuan hri leng vanga state mipuite harsatna hrang hrang an tawh mek avangin, inkahhai an puan chhung hian hel zawnga chetna engmah thlen an tum lo tih an sawi. A tum khatna atan Independence Day armed protest emaw, bandh emaw pawh an huaihawt dawn lo tih a sawi bawk. Hemi rual hian mipuite hnenah Independence Day lawmna duh lohna lantirna atana badge dum bel leh flag dumte vai turin a chah.

Assam chief minister Himanta Biswa Sarma chuan helpawl thutlukna siam chu lawmawm a tih thu sawiin, ULFA-I hotu chu inremna kawng zawnga inbiakna neihpui turin a sawm. Nimina Independence Day lawmnaa thu a sawiah Sarma chuan,"Assam mipuite aiawhin Paresh Barua inbiakna nei turin ka ngen a ni. Kan state-a ṭhalaite hi tumah thah ni tawh suh se," a ti.