Imphal-ah war heroes' memorial hawng

Manipur governor thar Ganga Prasad chuan 1891 Anglo-Manipur War-a martarte hriatrengna, Imphal-a Bir Tikendrajit Park-a siam chu kar liam ta Zirtawpni khan a hawng.

August 13 kha indonaa Manipur ram chhanna tura an nunna hlanta te hriatrengna atan hman a ni. Anglo-Manipur War-a an tlawm hnuah, Manipur prince Bir Tikendrajit Singh leh general Thangal te chu Britain lalnu laka indo puangah puhin, hemi ni hian British chuan an khaihlum a ni. Manipuri pasaltha an man dangte chu Andaman and Nicobar islands ah thawnin, Kalapani cellular jail-ah an tantir a ni.

War heroes memorial hawnna inkhawm hi chief minister N Biren Singh pawhin hmanpuii, Manipur mipuite chuan an ram chhanna tura an nunna hlantute chu an theihnghilh thiang lo, a ti.