Hel pawl hruaitu hlui thihna vangin Shillong khawpuiah buaina a chhuak

Meghalaya hel pawl Hynñiewtrep National Liberation Council (HNLC) hruaitu hlui Cheristerfield Thangkhiew (54) chu Zirtawpni khan a chenna inah Meghalaya police-te'n an kap hlum a; he thil thleng duh lohna hi nimin khan Shillong khawpuiah mipui ṭhahnem takin an lantir a, hmun hrang hranga buaina a chhuah avangin nizan dar 8:00 aṭanga August 17 zing dar 5:00 thleng curfew puan a ni.

August 10 khan Shillong-a Laithumkhrah bazar-ah bomb tihpuah a ni a, he bomb puakah hian mi pahnihin hliam an tuar. He thil thleng hi HNLC chuan anmahni tih a nih thu an puang a, he mi chhuina kal zelah hian HNLC General Secretary hlui Cheristerfield Thangkhiew chu Meghalaya police-te'n a chenna in Mawlai-ah man tumin an kal a, zing dar 3:00 vela inkahna thlengah Cheristerfield hi police-te hian an kap hlum a ni.

Police lam sawi danin Cheristerfield hian amah man tumtute hi chem hmangin a lo bei let a, hei vang hian an kap ta a, hemi rual hian a fapate pahnih an man tel bawk. Cheristerfield hi hel pawl hruaitu hlui langsar tak ni mah se nunphung pangngaia kir lehin kum 2018 khan police kutah a inpe tawh a, tuna bomb puak thila man tuma police-in an bei leh an kap hlum ta hial hi mipuiin an ngaithiam lo hle.

Cheristerfield-a chhungte chuan an pa hi tun hnaiah a damloh avangin mahni pawh insaseng thei mang lo a nih thu leh, police-te bei let tura chemte hûm tur pawhin a chak tawk lo an ti a, police-te chu inkahna lem (fake encounter) hmanga silai hmet puakah puhin an pa hi rawng taka thahah an ngai a; Meghalaya-a pawl hrang hrangin police chet dan an dem bakah chhui chian ngei an duh thu an au chhuahpui a, Home Minister bang turin an phût bawk.

Meghalaya chief minister Conrad Sangma chuan he thihna chhui tura magisterial enquiry an kalpui tur thu a puang a; Cheristerfield-a ruang hi nimin khan vui a niin he mi ni hi pawl ṭhenkhatin 'Black day' tiin Shillong hmun hrang hrangah flag dum an tar a, mipuiin kawng an zawh bakah hmun ṭhenkhatah buaina a chhuak a, police lirthei pawh hal a ni.