Sorkar laipuiin hmarchhak ST tan hamṭhatna tihpun duh : Athawale
Union Minister Ramdas Athawale chuan Thawhlehni khan sorkar laipuiin hmarchhaka cheng Scheduled Tribe mipuite tana hamṭhatna siambelh a duh thu a sawi.
Union Minister of State for Social Justice and Empowerment, Athawale chuan hmarchhak in cenhtral fund tam zawk a mamawh thu a sawi a, industry tam zawk din a ṭul thu pawh sawiin ṭhalaite tan pawh hna siam belh a ṭul thu a sawi bawk.
Ramdas Athawale chuan a ministry chuan hmarchhak state-te ṭanpui a duh thu sawiin, Scheduled Tribe cheng an tam avanga ṭanpui an ngaih lehzual thu a sawi. Hamṭhatna hrang hrang siam belh a duh thu te, zirlaite tan scholarship tihpun te, company dinna tura venture capital tur buaipuisak te leh pilot training nei tur te sum leh paia ṭanpui an duh thu te a sawi.
Venture capital scheme hnuaiah hian Social Justice Ministry chuan loan cheng nuai 20 leh nuai 15 inkar vel company a pek theih thu a sawi. Minister chuan an ministry chuan ram pawna lehkha zir SC/ST zirlaite tan scholarship cheng nuai 20 aṭanga nuai 60 thleng an pek ṭhin thu a sawi bawk.
Athawale chuan ram pumah rualbanlo mi vaibelchhe 2. 68 an awm thu sawiin, heng zinga nuai 4.8-te chu Assam mi an ni tih 2011 chhiarpui aṭanga a hriat theih thu a sawi a, heng mite tan hian Social Justice Ministry chuan an mamawh wheelchair, crutch leh bungraw dangte an pek ṭhin thu a sawi a ni.
Union Minister chuan Assam sorkar leh central public sector ṭhenkhat te meeting a neihpui thu leh, ST, SC leh OBC-te tana hna tam zawk siam dan tur a sawipui niin a tarlang bawk.