Meghalaya CM chenna petrol bomb-in bei : Home Minsiter-in CM hnenah banna a thehlut
Meghalaya-a helpawl hruaitu hlui, Chesterfield Thangkhiew thah a nih dana lungawi lohna kalzelah Pathianni zan khan chief minister Conrad K Sangma chenna in chu petrol bomb hmangin beih a ni.
Pathianni zan dar 10:15 vel khan motor aṭangin Upper Shillong, Third Mile-a CM personal residence-ah Molotov cocktail bottle pahnih hmangin petrol bomb hi vawm a ni a, mahse he thil thlengah hian hliam tuar an awm lo niin police-te chuan an sawi. A bur pakhat zawk hi in kawtah an vawm a, a pahnihna hi in hnung lamah an vawm lut a, mahse kangmei chhuak hi guard-te chuan rang takin an ṭhelh mit nghal a ni.
Police-te kutah Thangkhiew a thih dan chu inbeihna lem, fake encounter nia puhin mipuiten Shillong khawpuiah lungawi lohna lantirin hmun ṭhenkhatah buaina a chhuak a ni. Hei vang hian Shillong khawpuiah August 17 thleng curfew puan a ni tawh bawk.
Home Minister-in banna a thehlut
State home minister Lakhmen Rymbui chuan Chief Minister hnenah banna a thehlut a, Thangkhiew thih danah judicial enquiry nei turin a rawt nghal bawk.
CM hnena lehkha a thehluhah, Rymbui chuan thil thlengte avangin, Home (Police) Department a enkawlna aṭang chuan chawlhtir turin a ngen. Hei hi sorkarin Thangkhiew chunga thil thleng chungchanga zalen taka chhui a, thil thlen dan dik tak a chhui theihna tur a ni tih sawiin, judicial enquiry nei turin a ngen nghal bawk a ni.
Mobile internet leh SMS service titawp
Mipuite lungawi lohna an lantir leh, hmun ṭhenkhata buaina a chhuah avangin sorkar chuan Pathianni zan aṭang khan state pumah darkar 48 chhung atan mobile internet leh SMS service-te a titawp nghal bawk.
Sorkar chuan SMS, Whatsapp leh social media platform hrang hrang hmanga video, text leh thlalak thehdarhte chuan buaina tipunlunin, dan leh thupek bawhchhiatna nasa zawk a thlen thei tih a sawi. Hei vang hian boruak lian tham zawk chhuak tur venna atan leh, dan leh thupek ṭha taka kenkawh anih theihna atan titawp a nih tih a sawi.
Mobile service provider hrang hrangte pawh hriattir nghal niin, he thupek zawm lote chu IPC section 188 leh Indian Telegraph Act, 1885 hnuaiah hrem theih an ni ang.