CM zingah Himanta hi inpumkhatna tichhetu lian ber a ni : Akhil Gogoi

Assam MLA Akhil Gogoi chuan bawng humhalhna dan siam chungchangah chief minister Himanta Biswa Sarma chu na taka beiin, Assam chanchinah 'Chief Minister ni tawh zingah impumkhatna tichhetu, mi ṭhendarhtu lian ber' tia hriatreng a ni tawh ang, a ti.

Raijor Dal party hruaitu, Akhil Gogoi chuan Assembly House-a he bill hi an dan theih loh avangin Assam mipuite hnenah ngaihdam a dil nghal bawk. "August 13-a House-a bill pass a nih zanah khan ka mu miah lo a ni. He dan hi thil ṭha lo tak, mipuite inpumkhatna tichhetu tur leh rural economy tichhetu tur a ni," tiin a sawi.

"Assam chuan Himanta Biswa Sarma chu inpumkhatna tichhetu, mi ṭhendarhtu CM tiin a hre reng tawh ang. CM ni tawh zinga hlauhawm ber niin a rorelna hnuaiah Assam hi a him lo a ni," tiin Gogoi chuan a sawi. Bawng humhalhna bill pass tak chu Babri Masjid tihchhiat nena khaikhinin, an pahnih hian ram chhunga Hindu-Muslim inunauna tichhetu, thil hlauhawm tak a ni, a ti.

Bawngsa khapna siam chuan mimalin a ei duhzawnga duhthlanna tur zalenna a neih a tichhe tel dawn nia sawiin, MLA chuan state mipuite, a bikin Muslim leh Kristian-te chungah he dan siam tum an dang zo lo chu ngaihdam a dil takzet tih a sawi.

"He bill hian thingtlang lama bialte sum lakluh pawh a nghawng dawn hle a, thil man pawh a san phah hle ang. Bill pass a nih hnuah sa chi dang bakah artui leh sangha thlengin a man pawh a san phah nghal a ni. Bawngvulhtute an buai phah dawn a, a hnute sawr ngai lo bawng dangte chu talh turin an hralh thei tawh dawn lo a ni," a ti. Bawng zawrh leh hralhna chu a nghawng thui dawn hle tih sawiin, he market kaltlanga kum khata sum che vel chu cheng vaibelchhe 20,000-30,000 a ni pha a, a tam zawk hi rural area ami a ni tiin humhalhna bill pass a nih avangin heng an sum hmuhnate hi a tichhe tawh dawn a ni, a ti.

BJP kaihhruai sorkar chuan he dan hi Muslim-te bitumna atana siam ni mah se, a tawpkhawkah chuan bawng hmanga eizawng, state leilung fa, Hindu sakhaw zuite ngei chu a tuar na tur an nih thu Gogoi chuan a sawi bawk.

Animal husbandry and veterinary minister Atul Bora chuan August 4 khan Assembly-ah kum 2019-20 chhung khan Assam-ah bawngsa kg nuai 33.68 leh lawi sa kg nuai 1.59 hralh chhuah a nih thu a lo sawi tawh a ni. 2019-a Livestock Census neihah bawng vulh lai vaibelchhe 1.09 leh lawi vulh lai nuai 4.22 a awm thu a sawi bawk a ni.