AP leh Tripura-ah PM Modi a zin

Prime Minister Naredra Modi chuan Ningani khan Arunachal Pradesh leh inthlanna nei mai tur Tripura a tlawh.

Modi chuan Itanagar-a thu a sawinaah Congress chu beiin, an sorkarna chan lai chu bucket mawng pawp, khaia a leak ṭhin nen a tehkhin a ni.

Arunachal chu Hindi ṭawng hmang an tam avangin a fak hle a, hmarchhak state-ah chuan Hindi hman uar nasatna ber a nih thu sawiin "My Arunachal" a tiin a sawi hial bawk.

Modi chuan ramhhung hmun danga kar khat a zinkual chhunga Jai Hind tih a hriat aiin Aruna­chal-ah nikhat chhunga Jai Hind tih a hriat tam zawk thu a sawi.

PM Modi hian Itanagar-a Dorjee Khandu State Convention Centre hawnna hun a hmang a, State Civil Secretariat hlanna hun pawh a hmang nghal bawk.

Prime Minister chuan sorkar official-te leh private company-te hip thei tur conference leh cultural activity-te buatsaih a la nih dawn thu leh chung ho bulah chuan Arunachal tlawha Arunachal-a meeting nei tura a hriattir tur thu a sawi bawk.

Modi chuan hmarchhak mai bakah ram pumah health sector lama hmalak a ngaih nasat thu a sawi bawk a, human resource, infrastructure leh tunlai technology hmanna kawnga hmasawnna a pawimawh thu a sawi. Ramchhung hmun hrang hrangah hriselna lama hmasawnna a awm theihna turin medical college tam zawk din a nih theih nan hma an la mek tih a sawi bawk.

Modi hian nimin khan Tri­pura pawh tlawh bawkin Shanti Ba­zaar-ah leh Agartala-ah election campaign a nei nghal a ni.

Tripura-ah hian BJP hian Left sorkar hi paihthlak an tum hle a, tunhnaiah Prime Minister hian vawi hnih lai a tlawh tawh nghe nghe. Kar kalta lawk khan Tripura hi a tlawh tawh a, Left sorkar chu nasa taka sawiselin mipuite chanai eiah a puh a, sorkar laipui lamin hmarchhak hmasawnna atana a theihtawp a chhuah laia Tripura a hnungtawlh bik chhan chu kum 25 chhung an laka dik lo taka Left party-ten ro an rel vang niin a sawi.

Tripura hi naktuk hian an inthlang tawh dawn a ni.