Tripura-ah bomb pathum chhar

Tripura khawpui, Agartala aṭanga km 5 leka hlaah ramchhung siam bomb pathum chhar a nih thu Superintendent of Police (Control) Pradip De chuan Ningani khan a sawi.

Pradip chuan police leh Border Security Force (BSF)-ten bomb hi an laksawn tawh thu sawiin BSF-te kutah a awm mek tih a sawi bawk.

Bomb laksawn a nih laia lo awm ve BJP Ramnagar Mandal Prabhari Samarendra Chandra Deb chuan CPI-M thiltihah a puh nghal a ni.

Tripura-ah vek hian Nilaini zan khan ṭhalai 51, tiang leh rod keng chu man an ni bawk. Heng ṭha­lai an man te hi Agartala aṭanga km 50-a hla, Khiwai district-a Ram­chandraghat constituencty hnuaia Shonkhola area-ah an man a ni.

Sub-Divisional Police Officer (Khowai) Anirban Das chuan heng an mi man te hi Agartala lam pana mini truck-a an chuan laia an man thu sawiin, election authority flying squad-ten lo tiding in zing dar 12.45 velah an man niin a sawi.

An truck chuanna chu an dap hnuah tiang leh pawikhawih theihna hmanrua an hmuh avanga man an nih thu Das chuan a sawi. Dan leh thupek tibuai thei zawnga chet an tum nia a lan thu sawiin an vai hian man an ni a, Ningani khan bail-a chhuahtir an nih thu a sawi bawk.