PM Arunachal tlawh China-in dem
China chuan Ningani khan thuchhuah siamin Prime Minister Narendra Modi-an Arunachal Pradesh a tlawh chu an dem thu leh an duh lo thu an tarlang. Prime Minister hian Ningani tho khan Arunachal hi a tlawh a ni.
Chinese foreign ministry tupuangtu Geng Shuan chuan China-India border chungchanga China dinna chu a la ngai reng a, engmah tihdanglam a la awm lo a ni, a ti.
Geng chuan China sorkar in Arunachal Pradesh-tih hming a hriat ngai loh thu a sawi a, ram inchuh hmuna India hotutte an kal ṭhin pawh chu an dem thu leh an dodal tlat thu a sawi.
Chinese thupuangtu chuan India leh China-in ramri buaina chinfel a nih theih nana hun pawimawh tak an tawn mek thu a sawi a, ramri chungchangah hian ram pahnihin inbiakna leh indawrna pawh vawi tam tak an lo nei tawh tih a sawi bawk.
Geng chuan China lam chuan India chu an inbiak tawhna te leh inremna zawnga hma an lak tawhna te zah turin a ngen thu a sawi a, ramri buaina chungchanga zawhna awm thei reng reng laka inthiar fihlim turin a ngen thu a sawi a ni.
Geng Shuan chuan Mcmahon Line, China leh India inrina anga hunrei tawk kalpui tawh chu China ram chin a nih reng thu a sawi bawk. McMahon Line chu British-ten 1914-a an siam a nih thu leh India ram chin-a henglai area vel rin luh a nih theih nana an siam a nih thu a sawi bawk.
Ram pahnih inkara boruak ṭha tak awm mek chu zah tura India ngenin Geng chuan, ramri chungchanga inbiakna duhawm zawk leh inlaichinna ṭha zawk siam turin India chu a ngen bawk a ni.
India ram hruaituten Arunachal Pradesh an tlawh hian China hian a lo sawisel fo tawh a ni. India-China border hi km 3, 488-a thui niin ram pahnih hian ramri chungchangah hian inbiakna vawi 20 an nei tawh a ni.