Tripura-in assembly inthlan nei ta

Tripura Assembly inthlan chu nimin khan neih a ni ta a, boruak ralmuang tak hnuaiah zing dar 7 aṭang khan vote thlak ṭan a ni.

Tripura Assembly-ah hian sear 60 awm mah se seat 59-ah nimin bik kha chuan inthlanna hi neih a ni a, Charilam constituency-a ding tur Comminuist Party of India - Marxist (CPI-M) candidate Ramendra Narayan Deb Barma chu ni sarih kalta khan a thih avangin he constituency inthlan bik hi chu March 12-ah neih a ni ang.

Tlai dar 4 thleng polling station hi hawn a ni a, polling station 3, 214-ah vote thlak niin station tinah hian zing kar aṭangin vote thlak tur thui tak takin an intlar a ni.

Tripura inthlanah hian candidate 307 awmin rorel lai CPI-M chuan seat 56 an chuh a, hetih lai hian an thurualpui party RSP, Forward Bloc leh CPI-te chu seat khat ṭheuhah an ding thung.

Bharatya Janata Party(BJP) leh Tribal party Indigenous Peoples Front of Tripura (IPFT) pawh ṭangrualin BJP hian seat 51-ah candidate an nei a, a bak zawngah hian IPFT-te chuan candidate an nei thung a ni.

Kumin assembly inthlanah hian Congress chuan thawhpui an nei lo thung a, seat 59 chuhin Gomati district-a Kakrabon constituency-ah candidate an nei lo.

Tripura-ah hian vote thlak thei inziak lut mi 25,73,413 an awm a, heng zinga 13,05,375 chu mipa niin hmeichhia 12,68,027 an awm thung. Third category hnuaia inziak lut mi 11 an awm a, voter thar mi 47,803 an awm bawk. Scheduled Tribe tan seat 20 reserve a ni

State Director General of Police Akhil Kumar Shukla chuan Tripura-a inthlanna dik leh felfai tak a awm theih nan state pumpuiah venhimna uluk taka kalpui a nih thu a sawi a, state chhunga sipai leh police awmsa bakah central aṭangin sipai company 300 thawnluh an ni bawk tih a sawi. Inthlanna neih a nih lai hian BSF-te chuan uluk lehzuala ramri km 856-a thui pawh an ven thu a sawi.

Tripura Chief Electoral Officer Sriram Taranikanti pawhin inthlan atan bik hian Election commission chuan police observer, general observer leh expenditure observer a ruat thu a sawi.

Indo-Tibetan Border Police (ITBP) director general R K Pachnanda chu venhimna kalpui dan enfiah tu tur, special observer atan ruat a ni bawk.

Tripura inthlan result hi March 3-ah puan a ni ang.