Lok Sabha member aṭangin Rio a bâng

Nagaland aṭanga Lok Sabha MP Neiphiu Rio chuan Zir­tawpni khan Parliament mem­ber a nihna aṭanga a ban thu a sawi.

Rio hian state assembly inthlan neih turah chuhpuitu awm loa a tling tih a hriat hnu lawkah Lok Sabha MP a nihna aṭanga a ban thu hi a sawi a ni.

Rio hian kum 2014 khan Naga People's Front (NPF) ticket hmangin Lok Sabha inthlanah hian hnehna a chang a, Zirtawpni khan Lok Sabha Speaker Sumitra Mahajan hnenah banna lehkha a thehluh tawh thu a sawi.

Thla hmasa lawk khan Neiphiu Rio hian NPF a chhuahsan thu sawiin party thar Nagaland Democratic People’s Party (NDPP) a zawm thu a sawi nghal a, NDPP hian Chief Ministerial candidate a nih tur thu thuchhuah an siam chhunzawm nghal a ni. Assembly inthlan awm tura a khingpui NPF candidate Chupfuo Angami chu kar kalta Thawhṭanni khan a inhnuhdawh leh avangin chuhpuitu awm loin a dinna tur constituency-ah hnehna a chang ta a ni.

Nagaland Chief Mininster pawh vawi thum lai lo ni tawh Rio hian a hma pawhin chuhpuitu awm lo in assembly inthlanah hnehna a lo chang tawh a. 1998 kum khan Congress aiawha ding in chuhpuitu awm lo in a tling a ni.

Neiphiu Rio chuan inthlan hunah an party chu hnehna chang thei tura a rintawk thu a sawi a, BJP nen ṭangkawpin hnehna an chang ngei dawn tih a sawi.

Nagaland hi February 27 hian an inthlang tawh dawn a, Assembly-ah hian seat 60 awmin March 3-ah vote chhiar a ni dawn a ni.