Ram hruaitu ten AP tlawh theihna chanvo an nei: Raveesh Kumar

China in Prime Minister Narendra Modi-an Arunachal Pradesh a tlawh chungchanga demna thuchhuah siam chu India chuan chhang letin, External Affairs Ministry thupuangtu Raveesh Kumar ram hruaitu ten hmarchhak state-te chu tlawh theihna dikna chanvo an nei tih a sawi a, a ramchhung diktak a nih avangin an duh phawt chuan an tlawh theih thu a sawi.

PM Modi-a Ningani-a Arunachal a tlawh chu China chuan na taka sawiselin Arunachal chu South Tibet hmun pakhat a ni a, ramri inchuh lai a ni tiin boruak tichhe thei zawnga che lo tura an duh thu thuchhuah an siam a ni.

External affairs mi­nistry thupuangtu Ra­veesh Kumar chuan Zirtawpni kalta khan China chu chhanglet in Arunachal chu India ram chhung ngei a ni a, kan ram hruaitu ten tlawh theihna turin dikna chanvo an nei a ni, a ti.

Modi-an Arunachal a tlawh khan Chinese foreign ministry thu­puangtu Geng Shuang chuan Chinese sorkar in Arunachal Pradesh tih hming a hriat ngai loh thu leh India ram hruaitu ten an tlawh fo pawh an ngai thei lo tih a sawi.

India leh China inrina hi km. 3,488-a thui niin rarmi inchuh avang hian vawi 20 lai inbiakna an lo nei tawh a ni.