Meghalaya CM-in Police-te silai pe kir turin ti

Meghalaya chief minister Conrad K Sangma chuan Pathiannia Chesterfield Thangkhiew thah a nih dana lungawi lohna lantir, Shillong-a Jaiaw area-a police motor tichhia leh haltute chu police-te silai an laksak chu pe kir turin a ti.

Pathiannia hmaituam mi ṭhenkhatten police motor man sak a, an hal lai video chu social media lamah pawh a darh nasa hle. Police-te hian an silai kawl chu an motor-ah hian hnutchhiah nia sawi a ni.

CM Sangma chuan thil thleng hi a dem thu sawiin, police-te ta silai leh ralthuam dang an ken an taksa peng pakhat ang maia ngaih pawimawh tur a ni tih sawiin, an duty laiin heng ralthuamte hi an kalsan tur a ni lo, a ti. "He thil thleng hi ngaihthiam theih a ni lo. Ralthuam leh hmanrua kalsantu official leh police-te chu suspend an ni tawh a, chhui chian an ni dawn bawk a ni," tiin a sawi.

Pathiannia thil thlenna inhnamhnawih zinga police-te silai lo latute chu police department hnenah pe kir leh nghal turin CM chuan a ngen. Mipui lungawi loten police motor an beih lai hian motor-ah hian police pali an awm a, an zinga pakhat chu a silai nen tlanchhuakin, midang pathumte erawh chuan an silaite chu an tlanchhiatsan niin a sawi a ni.

Petrol bomb pahnih hmanga a chenna in beih a nih pawh thil awmze nei lo a nih thu Sangma chuan a sawi a, "Thil thlengte chhui chian leh chinfel tumin kan bei mek a, hetih lai hian kawng hrang hrang hmangin boruak ṭha lo thlen tir tur an awm thung a ni," a ti. Hei hi chet lak dan tur a ni lo tih sawiin, mipuite chu boruak ṭha tak hnuaia buaina chinfel dan kawng ngaihtuah turin a ngen. Tharum thawhna chu an dem thu sawiin, heng thil thlenga mawhphurtu chu an zawnchhuah ngei tur thu a sawi bawk.

Home minister Lahkmen Rymbui chuan banna lehkha thehlut mah se, CM chuan thutlukna a la siam loh thu a sawi bawk a ni. Home Minister hian Thangkhiew thah a nih dan chu sorkarin zalen taka a chhui theihna tur nia sawiin banna hi a thehlut a, judicial enquiry nei turin a ngen nghal bawk a ni.

RRAG-in CBI chhui tir phut
Rights and Risks Analysis Group (RRAG) chuan August 13-a police-ten Hynniewtrep National Liberation Council (HNLC) hruaitu hlui Chesterfield Thangkhiew an kahhlum dan chu Central Bureau of Investigation (CBI) chhui tir an phut.

RRAG director Suhas Chakma chuan he thil thleng avanga home minister Rymbui-a'n banna a thehlut chu lawmawm an tih thu sawiin, hemi rual hian CBI chhui tir a nih chauhin thil thlen dan dik tak chu a hriat theih dawn a ni, a ti.

Chakma chuan Meghalaya chu 2011 census-ah police nen inbeihnaa thi tam lamah India ramah 7-na a ni tih sawiin, kum 2014-2015 leh 2018-2019 inkar khan police-te nena inbeihnaah mi 1,073 an thi tih a sawi.