Nagaland united government siam turin party-ten inremna ziak

Nagaland-a rorellai, People's Democratic Alliance (PDA) leh eptu pawl, Naga People's Front (NPF) chuan Thawhṭanni khan eptu awm lohna ṭangrual sorkar, Nagaland united government siam turin resolution an ziak fel ta.

Resolution-ah hian chief minister Neiphiu Rio, deputy chief minister Y Patton, NDPP president Chingwang Konyak, BJP president Temjen Imna Along, NPF president Dr Shürhozelie Liezietsu, Leader of Opposition TR Zeliang, minister G Kaito Aye, minister Neiba Kronu, minister S Pangnyu Phom, minister P Paiwang, MLA Chotizuh Sazo leh MLA Imkong L Imchen-ten hming an ziak a ni.

Nagaland-a political party hrang hrangte chuan an state buaina chinfelna tur Naga peace talk neih mek chu tihfel a nih thuai a, remna leh muanna tluantling a awm theihna turin thawhho hi an remti a ni. State chhunga pawl hrang hrangte pawh lungrual taka Naga buaina chinfel a nih theihna atana thawkho turin an sawm nghal bawk.