Meghalaya NCP candidate Jonathone Sangma thah a ni

Meghalaya assembly inthlan neih tura Nationalist Congress Party (NCP) candidate, Jonathone N Sangma, chu Pathianni zan khan inthlan huna a dinna tur Williamnagar constituency chhungah ngei thah a ni. Sangma (43) bakah hian midang pathumin nunna an chan bawk.

Jonathone N Sangma hi East Garo Hills-a Williamnagar constituency-a ding tur niin Williamnagar-a Samanda-ah election campaign neia a kal haw lam chu Improvised Explosive Device (IED) bomb hmanga thah a ni a, report ṭhenkhatah kahhlum ni a sawi awm bawk mah se chhuichian mek a ni thung.

East Garo Hills-a Superintendent of Police MR Synrem chuan pawikhawihtu nia rinhlelh sawi nan a la hma deuhin sawi mah se Garo National Liberation Army (GNLA) hel pawl-te thiltih nia ngai mi tam tak an awm thung a ni.

Jonathone-a hi a campaign-hnaah hian GNLA-a tel ṭhin, bang ta Bhaichung Momin-an a kalpui a, police-te sawi dan chuan Sawilgre thingtlang khuaah campaign neiin an kal niin an sawi. He campaign-a an kal an haw lam hi zan dar 7.30 vel khan bomb hmanga beih an nih thu police te chuan an sawi bawk.

Beih an tawhna hmun hi inbiakpawh harsatna lai tak a ni a, Williamnagar police-te chu hriattir nghal an ni a, Police commando-te chu a hmunah hian an tlan nghal a, mahse darkar li hnu velah an inbe pawp thei chauh a ni.

Police-te sawi danin a hmun an thlen hian Jonathone campaign tour-a hman motor pali rauhsan an hmuh thu an sawi a, NCP Candidate chuanna Mahindra Scorpio phei chu IED puak vang hian a chhe nasa hle niin an sawi.

Beih an tawhna hmunah hian ruang pali hi hmuh a ni nghal a, midang pathum in hliam an tuar niin an sawi bawk.

Jonathone-a ruang bulah hian Bhaichung Momin ruang pawh hmuh ve nghal a ni a, mitthi pakhat hi Jonathone personal security officer Samin Hassan a ni tih an finfiah nghal bawk a, pakhat hi chu Williamnagar aṭanga an phurh pawl 12 zirlai school naupang a nih thu an sawi a ni.

Ruang pali-te hi Samanda health centre-ah dah nghal an ni a, hliam tuarte erawh hi chu Williamnagar civil hospital-ah hruai an nih hnuah an hliam nat deuh avangin Guwahati-a GNRC damdawi-inah Pathianni zan la la khan hruai nghal an ni.

Ni eng emaw zat kaltaah khan Williamnagar-a thingkung leh bangah te Jonathone-a vauna thu, Garo ṭawnga inziak hmuh tur a lo awm nual tawh a, "Jonathone Sangma vote chu thah an ni ang" tih te a inziak a ni.

Sangma hi 2013 khan independent candidate-a dingin tunhnai lawk khan NCP hi a zawm ve chiah a ni. 2013 khan vote tlemte-in Marak a hneh zo lo a ni. .

National People's Party Chief Conrad Sangma chuan he inbeihna hi a dem thu a sawi a, inthlan boruaka hetiang thil a thleng hi pawi a tih thu sawiin sorkar laipui lamah pawh inthlanna felfai leh ralmuang tak a awm theih nan an hriattir ngei tur thu a sawi.

Meghalaya Chief Minister Mukul Sangma chuan Facebook-ah Jonathone Sanma chanchin a hriat chu pawi a tih thu a ziak a, a chhungkhatte a tawrhpui thu a ziak bawk. Pawikhawihtu pawh man a nih theih nana theihtawp an chhuah dawn thu a ziak bawk a ni.

Meghalaya hi February 27 hian an inthlang tawh dawn a, March 3-ah inthlan result hi puan a ni ang.