Tripura Assembly inthlanah vote 78% aia tam tla

Tripura Assembly inthlan, Pathiannia neih takah khan hriat theih chinah mi 2,536,589 in vote an thlak a, hei hi vote thlak thei zawng zawnga zinga 78% aiin a tam a ni. Chief electoral officer Sriram Taranikanti chuan harsatna lian tham em em awm loa inthlanna hi kalpui a nih thu a sawi.

Sriram Taranikanti chuan vote thlak zat hi a la pun tur thu a sawi a, hei hi a chhan chu Pathianni zan dar 10 pawh khan vote thlak tur hian polling station 100 velah chuan sei tak an la intlar vang niin a sawi.

Heng vote thlak zawng zawng chhiar kim a nih hunah chuan vote thlak zat hi a la pun ngei dawn thu sawiin he thu ziah lai hian heng polling station 100-a vote tla zat hi hriat a la ni lo thung.

Taranikanti chuan VVPAT (Voter Verifiable Paper Audit Trail)191 (6 %) leh EVM (Electronic Voting Machines) 89 (5 %)-ah khawl lam buaina an tawh avangin inthlan hi a kaihlak deuh thu a sawi bawk.

Karamchara assembly consti­tuency hnuaia polling station-ah chuan vote thlak ṭha leh tura thu­tlukna an siam thu sawiin, he constituency-ah hian BJP (Bhara­tiya Janata Party) leh CPI-M (Communist Party of India-Marxist)-te pawhin vote thlak ṭhat leh hi an ngiat tih a sawi.

Tripura media ṭhenkhatin an tarlan dan chuan BJP lam hian polling station pariat-a vote thlak ṭhat leh an duh tih an tarlang a, CPI-M pawhin polling station pathuma vote thlak ṭhat leh an duh thu an tarlang bawk.

Hetih lai hian rorel Left Front con­venor Bijan Dhar chuan Left Front candidate election agent panga te chu BJP leh a thurualpui IPFT worker ten an beih avangin damdawi-inah dah an nih thu a sawi.