Tripura in record siam, vote 92% tla

21st February, 2018

Election Department official-te chuan Thawhṭanni khan Tripura Assembly inthlanah vote 2,536,589 a tlak thu an sawi a, hei hi vote thlak thei zawng zawng zinga 92% a nih thu sawiin India electoral history-ah record a nih thu an sawi.

Kum 2013 leh 2008 assembly inthlanah khan Tripura-ah hian vote 92% leh 91% a lo tla tawh a, Election offical-te chuan tun ṭumah hian vote thlak zat chhiarnaah hian 90% (89.8) vel a tla niin an sawi a, postal ballot zawng zawng nen an chhiar hnuah vote ho 92% aia tam hret a tlak thu an sawi bawk.

Inthlan buaipuitute chuan postal ballot hmang hian vote 50, 000 vel a tlak thu sawiin, heng vote thlak zingah hian security personnel-te pawh an tel thu an sawi.

Tripura inthlanah hian Pathianni zan dar 10 velah pawh khan polling staion 100 velah chuan vote thlak tur hi thui tak an la intlar a, polling station hi 3,174 a awm a ni.

Official-te chuan Tripura Khowai district hnuaia Ka;yanpur constituency ami Malay Sardar Para polling station-ah phei chuan zing dar 12.45-ah pawh vote thlak turin an la intlar tih an sawi.

Polling staion ṭhenkhatah VVPATs (Voter Verifiable Paper Audit Trails) leh EVMs (Electronic Voting Machines) lamah harsatna tawk lo phei se chu tun ai hian vote tla percentage hi a la san an rin thu an sawi bawk.

Chief Electoral Officer Sriram Taranikanti chuan Pathianni zan khan VVPAT 191 leh EVM 89-ah harsatna an tawh thu a sawi a, sorkar lai Left Front covenor Bijan Dhar chuan polling staion 520 velah EVM khawl a buai tih sawiin chhui chian a phut thu a sawi a ni.

Election Fepartment Official chuan VVPAT leh EVM vanga harsatna tawhna hmunah hian a chhe lai siamṭhat a nih hnuah vote thlak hi chhunzawm leh a nih thu a sawi.

Tripura Assembly inthlanah hian candidate 292 awmin heng zinga 23 hi hmeichhia an ni thung a, Vote hi March 3-ah chhiar a ni dawn a ni.

Constituency 60 awm zinga 59-ah inthlanna hi neih a ni a, Charilam constituency bialtu MLA, CPI-M candiate Ramendra Narayan Debbrama boral avangin he constituency-ah hian March 12-ah an inthlang dawn thung.