Assam-in Kaziranga bulah Heliport siam tum

Assam sorkar chuan Kaziranga National Park bulah heliport siam a tum tih Chief Minister Sarbanada Sonowal chuan Pathianni khan a sawi a, khualzin mite nasa zawka hip an nih theihna tura ruahman a nih thu a sawi bawk.

Kaziranga National Park-a Forest personnel-te hnena silai an semnaah Sarbanada Sonowal chuan a cabinet minister pathum-te hnenah Kazi­ranga bul vela heliport siamna tur hmun ṭha tak zawng tura a tih thu a sawi.

Heliport hi helicopter ṭhumna hmun tur niin helipad mai bakah facility pawimawh dang, terminal tenau deuh-te pawh siam a ni ṭhin a ni.

Chief Minister office-in official-a thuchhuah a siamah chuan Sonowal-an Forest and Environment Minister Pramila Rani Brahma hnenah a hma thei ang bera Kaziranga-a international standard convention centre siam tura a tih thu tarlan a ni bawk.

CM Office thuchhuah­ah chuan forest minister bakah hian Water Re­sources Minister Keshab Mahanta leh Agriculture Minister Atul Bora, Kaziranga National park chhehvel constituency-a MLA pahnihte pawh heliport siamna tur hmun thlithai tura tih an nih thu an tarlang a ni. Hna ṭan hun tur erawh tarlan a ni lo thung.

Silai semna hunah hian Sonowal hian 272 INSAS rifle, 954 SLR, 2 Bore Pump Action Gun unit 133 , 9mm pistol 20 leh Ghatak rifle 91 a semchhuak a, CM chuan heng ralthuam a semchhuahte hian Kaziranga venhimna kawnga hmasawnna a thlen ngei a beisei thu a sawi.

Sonowal chuan a ruka sa pel ṭhinte awlsam zawka man an nih theih nan Wildlife Fast Track Court 10 an siam thu a sawi bawk.