Manipur-a Marangching thingtlang khaw mipuite'n rel kawng siam dang

Manipura-a Tamenglong district chhunga Marangching thingtlang khaw mipuite chuan Thawhṭanni khan an ram chhungah rel kawng siam an duh loh thu sawiin rel kawng siam mek chu an dang a, compensation hmu tura an tih ang an hmuh loh vang a nih thu an sawi bawk.

Marangching khaw mipuite hian rel kawnga lei verh tur pasarih chu an dang a, cheng maktaduai 36 compensation hmu tura an tih chu an hmuh loh thu an sawi.

Village head N. Goudamei chuan sorkarin an khaw mi, rel kawng siamna vanga ram chan tate tan compensation a sanction thu sawiin hei hi an la hmu lo niin a sawi. Goudamei chuan tribal mi pahnihin Collector Armstrong Panmei kut aṭanga pawisa hi an lakchhuah thu sawiin compensation hmu tur te hian hemi te kut aṭang hian an la dawng lo tih a sawi bawk.

Khaw mipuite hian thuneitute lamah compensation hi sem a nih theih nana nasa taka an ngen hnuah rel kawng siam mek hi an dang ta a ni. Khaw mipui ṭhenkhat chuan Bharatiya Janata Party (BJP) chuan eirukna nasa taka do anga a lan laiin engmah hma an la tak tak lo niin an sawi thung.

Rel kawng siam danchah a nih avang hian rel kawng siamtu company lam chuan an hna a khaihlak nasat thu leh sum pawh an chan hnem tawh thu an sawi a, hnathawhna hmuna venhimna pawh a chiri hle tih an sawi bawk.

Hnathawktute hi Manipur state pawn mi deuh vek an nih avangin hna an thawk ṭha thei lo niin an sawi bawk a, mipui lungawi lo pungkhawm, mimal thil tihchhiat leh official kidnap-te a lo thlen fo ṭhin tawh avangin hna hi an thawk lui ngam lo tih an sawi bawk.

North Eastern Frontier Railway official-te chuan kawng dan avang hian hna hi a la khaihlak deuh reng an rin thu an sawi a ni.