Jonathone thih chhan chu dan kenkawh ṭhat loh vang : Rajnath Singh
Union Home Minister Rajnath Singh chuan Thawhṭanni khan National Congress Party (NCP) candidate Jonathone N. Sangma thah a nih chuan Meghalaya-a buaina tam zia leh dan kenkawh ṭhat tawk loh zia a tilang niin a sawi.
East Garo Hills-a Songsak-a election rally a neihnaah Rajnath Singh chuan Williamnagar seat a din tum Jonathone N Sangma thah a ni chu pawi a tih thu a sawi a, rawng taka inthah a nih chuan Congress sorkarin dan leh thupek a kenkawh ṭhat tawk loh zia a lantir niin a sawi bawk.
"NCP Candidate beih a nih hian mipuite venhimna kawngah Mukul Sangma a hlawhchham tih a lantir a ni", a ti.
Inbeihna thlen lai mita hmutu Benjamin Marak chuan Jonathone beih a nih dan chu ruahman lawk nia a lan thu a sawi a, Samanda-a bomb in SUV a puah hnan dan a ngaihtuah letin thil tumlawk sa reng nia a lan thu a sawi.
He inbeihnaah hian NCP Candidate Jonathone N. Sangma bakah hian midang pathum in nunna an chan a, hliam tuar dang pali chu Guwahati Medical college-ah hruai an ni bawk a ni.
He pawikhawihna thleng hi eng pawl mahin an tih a nih thu an la sawi lo a, East Garo Hills Deputy Commissioner Ramkumar Singh chuan pawikhawihtu mai bakah hian Samanda, Damagre, Nengkhra leh hmun danga Jonathone duh lohna poster tar tute chu zawn mek an nih thu a sawi.